وقفة نظام مع التغيير

السلام عليكم
ازيكم يا شباب
مبروك علينا التحرير جميعا وحان وقت البناء
انا فيه حاجات كتير عاوز اتكلم عليها ومش عارف ابدا بايه وازاى بس اللى هيجى على بالى هكتبه
الاول فى عز انتصارنا ونجاح الثورة لازم مننساش حاجة مهمة الا وهى
اننا كل اللى حققناه عملنا واحنا كلنا ايد واحد ومطالبنا واحدة وهدفنا واحد وعاوزين نفس الروح تفضل مجمعانا
تانى حاحة ممكن البعض يستغربها بس انا حابب اقولها
بالنسبة للرئيس السابق محمد حسنى مبارك
مش عاوزين نكون ناكرين للجميل ونطلع فى الاخر شعبب قليل الاصل
هو نعم اخطا واخطاء كتير ومكناش عاوزينه رئيس للجمهورية
بس كل واحد فينا معرض للخطا ومحدش معصوم من الخطا وربنا بيسامح وبيغفر
احنا مش هنغفر
لو على الفلوس وانه سرق البلد ونهبها فى تحقيقات وهتبين كل حاجة
هو عمل كتير حلو حمانا من الحروب واتعلمنا واكبرنا وعندنا نت والحياة كانت ماشية صحيح كانت بطئية ومش زى ماحنا عاوزين بس اهى كانت ماشية واحنا مشيناه علشان تمشى اسرع
بس اللى حصل انها بدات توقف تانى
لا وايه احنا اللى بنوقفها
طيب كل واحد ليه مطالب او مظلوم يحاول يغير ويعترض وهو فى مكانه بيشتغل ويبنى ويغير مش نعمل اضراب
فرجاء الكل يدعو للعمل والبنا والتغير فى نفس الوقت
تالت حاجة وملحوظة اوى
احنا كنا عاوزين ديموقراطية
ولما بدانا ناخدها اول حاجة عملناها كل واحخد بقى عاوز يفرض رايه ويعارض التانى ويتعدى عليه ويشتمه وبقت هيصة
ده خاين وده عميل وده حمار مش بيفهم
لا وايه كل واحد جى يتكلم يقول رايه يقعد يرص جملة
يا جماعة انا مش اخوان ولا برادعى ولا حزب وطنى ولا انتمى لاى حزب
وايه المشكلة يعنى لو كان واحد من دول
كل واحد المفروض يتكلم براحته ويقول رايه
لازم نؤمن بالراى الاخر والمعارض مش ده اللى كنا عاوزينه
فيه ايه لما تختلف معايا فى الرا تقولى والله دى وجهة نظرك وانا احترمها
ليه لازم اما تقنعنى او اقنعك
كل واحد وله تفكيره
يعنى ياريت نحاول نغير ده فينا وننشره ما بينا
الاهم بقى لما ننزل نتعامل فى المصالح الحكومية او اشغالنا نتعامل بروح جديدة ومحدش يتنازل عن حقه وعن الاسلوب المناسب فى التعامل واللك يراعى ربنا فى عمله ويتقنه ولو شوفت حد مش شغال كويس قوله يتقى ربنا واجهةه متوقلش انا مالى حتى لو هتشتكيه
خلينا نتغير فى كل حاجة وربنا يوفقنا جميعا وان شاء الله تبقى مصر احسن بكتير بينا

عندك حق والله يا احمد انا معاك فى ان كل واحد عنده مشكله دلوقتى بقى يعمل اضطراب
ومالوش دعوه بحد حتى لو المشكله دى بسيطه انا متحمسه جدا للثوره
وكل الحققناه بسببها لحد دلوقتى واللى لسه هيتحقق
لكن البيقولوا اشمعنا انا وانا كمان اعمل اضراب دا بجد مش فاهم حاجه
انا حاسه اننا بعد ما اتقدمنا لقدام ميه خطوه رجعنا تانى وقفنا بسبب الحاصل من اضرابات متكرره
اقولكم على موقف حصل معايا شخصيا وانا نازله الشغل النهارده لقيت سائقين المترو كانوا عاملين اضراب
واتعطلنا نص ساعه على الشغل والدنيا اتزحمت
بجد عاوزه اقول كفايه كدا خلينا نشتغل شويه لو كل واحد عمل اضطراب لمطلب فئوى
مين الهيشتغل فى البلد نسيبها يعنى ونقعد فى البيت بجد حرام البيحصل .