رسالة من السماء

صباح الخير يا عمو ..
أنا مصطفى.. أيوه مصطفى أيمن عفت.. أكيد عارفني.. ده أنا اسمي و«خبري» ملا الجرايد والتلفزيونات
أبعث لك هذه الرسالة من السماء! أيوه من عند ربنا
حبيت أقول لماما وبابا مايزعلوش عليا.. أنا هنا أحسن كتير.. بس يا عمو أنا عايز أحكيلك حكايتي علشان نفسي الولاد والبنات أصحابي في المدرسة والنادي ما يحصلهمش اللي حصل ليا.. وأكيد إنت عندك أولاد.. همه هيفهموني أكتر منك.. بس مهم كل الأطفال اللي في سني يعرفوا إني مش زعلان.. كل الموضوع إني خايف عليهم.. بس

يوم الأربع اللي فات.. تعبت قوي يا عمو.. حسيت إن وداني و"زوري" جواهم نار.. بابا حبيبي جري بيا على الدكتور اللي متعود عليه.. إداني دوا وكان المفروض أبقى كويس.. لكن تاني يوم حرارتي زادت قوى.. بابا حبيبي اتصل بالدكتور فلقى موبايله غير متاح.. فجري بيا على دكتور تاني كتب حقنة «فولتارين»، وطلب من بابا ياخدني لمستشفى حميات العباسية.. بصراحة يا عمو أنا فرحت قوي لما عرفت إني هروح مستشفى الحميات الكبيرة والمتطورة اللي بيتكلموا عنها في الجرايد والتليفزيون.. أنا أصلي كنت تعبان قوي قوي ونفسي في علاج كويس
مش هطول عليك يا عمو.. بابا حبيبي أخدني لحميات العباسية.. هناك استلمني دكاترة شبان شكلهم كده لسه في «الامتياز»، كنت ساعتها فاقد الوعى، ولكن حاسس بكل اللي بيدور حواليا.. دخلوني العناية المركزة، وأخدوا "مسحة" من زوري لتحليلها.. نمت في العناية فترة طويلة ومافيش دكتور كبير أو حتى «نُص نُص» شافني.. بابا حبيبي جاله انهيار لما طلبوا منه يجيب بلازما وصفائح دم من الخارج.. صرخ وقال لهم: هو هنا مفيش دم؟
قالوا ببساطة وهدوء: لأ.. مفيش دم.. اتصرف من برة وهات دم
قال: خدوا دم مني ومن أقاربنا وأصحابنا
قالوا له: مفيش أجهزة لتحليل الفصيلة هنا
بابا حبيبي غاب ورجع وهو "بينهج" بأكياس الدم
أنا كنت بنزف جامد قوي قوي يا عمو

بابا حبيبي مالحقش ياخد نفَسه..
قالوله عايزين أشعة مقطعية.. فقال: اعملوها.. ردوا: مفيش جهاز أشعة هنا
صرخ أبي للمرة الألف وأصر على إخراجي على مسؤوليته لمستشفى دار الحكمة .. وصلت عربية الإسعاف .. وحطوني على جهاز التنفس الصناعى.. وإحنا في الطريق يا عمو عرفت إن خلاص مفيش فايدة.. كان نفسي أتكلم كلمة واحدة.. كان نفسي أقول لبابا حبيبي ماتزعلش إنت وماما وأختى.. بلغ أصحابي إني بحبهم قوي قوى
في دار الحكمة وصلت نتيجة التحليل اللي اتأخر جداً جداً.. قالوا إني عندي «أنفلونزا الخنازير».. طيب إزاي سابوني كل ده من غير علاج.. مش همه اللي بيقولوا إنها بسيطة ويمكن علاجها بسرعة؟!.. قلت لنفسي مفيش فايدة من الكلام.. أنا خلاص بموت
بصراحة يا عمو كنت زعلان قوي قوي من اللي حصل ليا.. قلت ليه بيعملوا كده في طفل عمره تسع سنين؟!.. نمت شوية كتير.. وبعدين لقيت جسمي خفيف!!!! .. خفيف قوي قوى.. وبعدين لقيت نفسي بطير في السما
خلاص .. خلاص مُت يا عمو .. كانت الساعة خمسة ونص فجر السبت اللي فات.. زعلت قوي قوي إني مش هفرح بابا وماما بيا.. عارف يا عمو كنت بحلم إني أطلع طيار زي بابا حسني.. أو مسؤول كبير قوي قوي وليه هيبة زي عمو نظيف.. أو دكتور غني قوي قوي زي عمو حاتم الجبلي.. كنت بلعب سباحة في النادي الأهلى.. وكرة قدم كمان.. كنت هطلع بطل رياضي وأشرّف بلدى.. عارف يا عمو رغم كل اللي حصل ليه أنا لسه بحب مصر قوي ونفسي تفوز بكاس العالم
تاني يوم وأنا فوق في السما تابعت مؤتمر الحزب الوطنى
وسمعت خطب كل قيادات الحزب والوزراء..
كلامهم جميل قوي قوي يا عمو..
دي مصر بقت جنة
بس معقولة يا عمو إن مصر بقت جنة بعد موتي بيوم واحد بس!؟

توبيك رائع يا شوشو يسلم ايديكى

الله يرحم مصطفى و كل شهداء الاهمال و الرجعيه و البيروقراطيه الى غرقونا فى بير ضلمه من التشتت و الحيره و الغربه بالرغم اننا جوه بلدنا
و ربنا يستر على الاطفال و على الكبار من انفلونزا الطيور و الخنازير و كل ما هو أتى لان هنا الانسان ملهوش قيمه فعليه عشان يحقنوه بمضاد للفيروس الى هو اساساً اتصنف انه وباء خطير و لكن الحمدلله مستقر يعنى مش بيغير من شكله و بكده ممكن التطعيم منه

بس غريبه ان مصطفى الله يرحمه كان بينزف هو من اعراض انفلونزا الخنازير النزيف ؟ سورى سؤال مش فى وقته بس خطر فى بالى و انا بقرأ الموضوع بصراحه

لا يا موكا مش من اعراض انفلونزا الخنازير انه ينزف هو نزف علشان حقنه فولتارين وده كان غلط ( الاسبرين و الفولتارين واي دوا اخره اين خافض للحراره ممكن يموت لمريض انفلونزا الخنازير )

الله يرحمه و يرحم موتى المسلمين و احيائهم

شكراً للمعلومه يا شوشو

الله يرحمه مصطفى كان طيب اوى وراح ضحية الاهمال اللى محدش يقدر ينكره
وفعلا احنا بلد الكلام لو الى بيتقال ده بس بيتعمل نصه كان زمانها بقنا احسن دولة فى العالم بس الحمد لله انها مازاالت بلد الامن والامان
تسلم ايدك يا شوشو على الموضوع الجميل ده
دايما مواضيعك متميزة ونتتظر منك المزيد